Motorkontrakt for Rolls-Royce
Rolls-Royce inngår motorkontrakt med den nederlandske marine
Rolls-Royce har inngått kontrakt om levering av dieselmotorar til den nederlandske marine sitt Joint Support Ship (JSS).
Fartøyet skal utstyrast med fem Bergen motorar frå Rolls-Royce, for dieselelektrisk kraft og framdrift. Det 205 meter lange fartøyet skal byggast ved Damen Schelde Naval Shipbuilding sine anlegg i Romania og Nederland, og skal leverast i 2014.
- Dette er ein viktig kontrakt for oss, som vi vann i sterk konkurranse med andre leverandørar, seier John Knudsen, Senior VP Diesels i Rolls-Royce, og plass-sjef ved motorfabrikken i Bergen.
- Den viser kor relevant våre motorar er for marinesektoren, og vidarefører den sterke relasjonen Rolls-Royce har med Damen og den nederlandske marine. Vi er svært fornøgde med at vår innovative teknologi igjen har blitt valgt.
Det robuste fleirfunksjonsskipet er spesielt utforma for maritim støtte og strategiske rednings- og sjøbaseoppdrag både på ope hav og i kystfarvatn. Skipet har muligheit for etterfylling av drivstoff til sjøs, lagring av forsyningar, transport av materiell og personell, og for omfattande medisinsk, teknisk og logistisk støtte.
Rolls-Royce sin Bergen-serie av dieselmotorar passar til ei rekkje framdriftskonfigurasjonar, som hovuddrivkraft eller som hjelpeaggregat i marine hjelpefartøy, der påliteligheit, drivstofføkonomi, levetidskostnad og minimal miljøpåverknad er viktige faktorar. Det finnast i dag over 4000 Bergen-motorar i drift i offshore-, handelsfartøy- og marine-sektoren.
Rolls-Royce er ein leiande leverandør av marinesystem og har tidlegere levert gassturbinar og gassturbinstøtte, propellar og stabiliseringsutstyr til den nederlandske marine. Selskapet forsyner 70 mariner med eit breidt spekter av utstyr.
12. februar 2010
© SALT - Aare Forlag - All rights reserved - 2010
